ERGAA PHEEXIROS ISA JALQABAA

KUTAA LAMMAFFAA

• Qorannoo kitaabichaa tarreedhaan.

• Nagaa. 1Phex. 1-3. Kutaa kana keessaatti Ergamichi Pheexiroos gara handhuura ergaa isaatti utuu hin seeniin amantoota ergicha fudhataniif nagaa dhiyeessa. Ergaa isaa kana keessatti eenyummaa mataa isaa, eenyummaa Waaqayyoo fi eenyummaa Amantootaa ibsuudhaan nagaa isaa dhiyeessa.
• Eenyummaa /Identity/

Eenymmaa yookaan maalummaa waan tokkoo beekuun gatii fi akeeka waanti sun qabu beekuuf baay’isee nama gargaara. Eenyummaa ofii beekuun illee akkuma kana. Eenyummaa ofii namni beekuu danda’ee jennaan waan hojjechuun isa irra jiraatu sirriitti hojjechuuf isa ni gargaara. Eenyummaa ofii wallaaluunis akkuma sana sirriitti akka namni dhimma hin baafne nama gochuu ni danda’a. Ergamichi Pheexiroos egaa ergaa isaa warra fudhataniif utuu tokko-tokkoon hin tarreessin dura eenyummaa mataa isaa, kan Waaqayyoo fi amantootaa ibsa.

• Eenyummaa Pheexroos : Pheexiroos ergaa isaa akkuma seeneen maalummaa isaa warra xalyaa isaa dubbisaniif ibsa. “ Ani Ergamaan Yesuus Kristoos kana caafuu koo ti.” 1Phex. 1:1. Iddoo kana irratti ergamichi eenyummaa isaa ibsuudhaan jalqaba. Bara sanatti eenyummaa ofii jalqaba irratti ibsuun akkuma bara nuti keessa jiraannu kanaa amala qabiyyee xalyaa barreessuu keessaa tokko ture. Ergaawwan kan biraan Kakuu Haaraa keessa jiranis amaluma kana akka isaan qaban ilaaluun ni danda’ama. Phexroos waa’ee eennyummaa isaa yemmuu dubbatu waan lama ibsa.
• Ergamaa. Jechi kun afaan jalqaba ittiin barreeffameen ‘ apostolos’ kan jedhu yemmuu ta’u kan inni mul’isu waa’ee nama ajaja addaa fudhatee; ergaa addaa qabatee, akeeka addaatiif qaama ol’aanaa tokkoon ajajamee adeemuu agarsiisa. Gabaadhumatti nama aboo fi ergaa addaa qabu jechuu ni dandeenya. Pheexroos egaa waan inni ergaa isaa keessatti barreessuuf jedhu kun waan inni ofii isaa itti dadhabee falaasamee, yookaan barumsa addaa fudhatee erga irratti qorannoo gaggeessee boodaa waan barreessuuf jedhe osoo hin taane ergaa addaa baay’ee barbaachisaa kan ta’e namootatti himuuf galfata addaa qaama ol’aanaa tokko irraa fudhatee dabarsuuf jechuu isaa seensa xalayaa isaa irratti hubachiisa. Biyya lafaa kana keessa kitaabolee lakkoofsaan hedduu ta’antu jiru. Irra caalaan isaanii kan isaan ibsan waa’ee namootuma barreesse sanaa yemmuu ta’an ergaan isaan dabarsan illee ilaalchaa fi muuxannoo barreessichaa ti. Ergan Pheexroos barreessu kun garuu akka kana miti. Ilaalchaa fi muuxannoo Pheexroos utuu hin taa’in galfata addaa dabarsuuf kan barreeffame dha. Macaaf Qulqulluu kitaabota kan biraa irraa adda kan godhu keessa tokko isa kana. Kitaabolee Macaaf Qulqulluu keessatti barreeffaman tokko tokkoon yoo sakattaane kan nuti arginu handhuura ta’ee kan mul’atu eenyummaa warra barreessanii utuu hin ta’in abbaa ergichaa isa ta’e Waaqayyoo fi ergaa inni ilmaan namootaaf qabu dha.

Inni kun har’uma iyyuu taanaan safara ergaa, lallaba, barreeffama kitaabolee hafuuraa fi walumaa galatti tajaajila waldaan Kristiyaanaa laattuu ta’uun ni barbaachisa. Handhuurrii fi xiyyeeffannaan tajaajila keenyaa ergaa fayyinaa Waaqayyo ilmaan namootaatiif qabu dabarsuu irratti kan hundaa’ee fi akeekkate ta’uun ni barbaachisa.

• Ergamaa Yesuus Kristoos. Pheexroos ergamaa ta’uu isaa ibsuun akkuma isa barbaachise eenyuuf akka ergames ibsuun barbaachisaa ta’uu isaa ni ibsa. “ Ani Ergamaan Yesuus Kristoos kana caafuu koo ti.” 1Phex. 1:1. Namni ergaa ergame tokko ergaa fi aboo qaama isa ergee tokko bakkaan ga’uuf akkuma adeemu Pheexroos ergaa fi aboo Yesuus Kristoos isatti kenne bakkaan ga’uuf adeema. Burqaa fi abbaan ergichaa Yesuus Kristoos dha. Meeshaa Yesuus Kristoos ta’uudhaan akeeka addaa bakkaan ga’uuf barreeffama kana barreessaa jira. Isa kana Math. 10:1-9 keessatti Yesuus aboo isaa ergamoota isaatiif yennaa kennu; akkasumas ergaa isaa ammoo Math. 18:19-20 keessatti yemmuu kennu argina. Egaa akka nama Yesuusiif ergamuutti Yaada Yesuus fi ergaa isaa bakkaan ga’uun itti gaafatama guddaa dha.

Baroota keessatti namoonni akka dhuunfaatti waldaan Kristiyaanaa illee utuu hin hafin dubbii kanaan qoramaniiru. Baay’een ka’anii baroota keessatti dubbii Waaqayyoo fakkeessuudhaan fedhaa fi ergaa mataa isaanii dabarfachuu yaalaniiru, dabarfataniirus. Har’as waan Waaqayyo hin jedhin akka waan inni jedheetti yaaduma namootaatiin wal-fudhachiisuuf jecha akka ergaatti kan namootatti himan hedduutu jiru. Kaan ammoo ergaa Macaaf Qulqulluu jal’isuudhaan hundee fi barsiisa sobaa kaa’uudhaan namoota hedduu karaa irraa illee kaachisaniiru. Bara nuti jiraannu kana keessa keessumaa biyyoota guddanneera jedhan keessatti kan calaqisu isa kana. Waldoonni Kristiyaanaa duwwaatti hafaa jiru, namoonni ergaa Macaafa Qulqulluu dhaga’uu irraa gurra isaanii deeffatanii jiru. Kun akkamitti ta’e, eessaa ammoo burqe jennee yoo qorannee ilaalle baroota keessatti nuti beektota jedhanii ogummaa namootaatti hiikkaa isaan Macaaf Qulqulluudhaaf kennan akka erga Waaqayyootti fudhachuun ergaa Waaqayyoo salphisanii ilaaluu irraa dhufe.

Waa’ee seenaa namoota waaqayyoo fi saba Waaqayyoo yoo ilaalle seenaa Waaqayyoof adeemuu ti. Abrahaam yemmuu waamame akka adeemuuf isa abboome. Yemmuu adeemus ofii isaaf mataadhuma isaaf akka jiraatuuf utuu hin ta’in Waaqayyo bakka inni deemu hundatti akka isaan mul’atuuf ture. Abrahaam garuu yaada Waaqayyo isa waameef adeemu irra yaada mataa isaaf adeemuu irratti yeroo dheeraa dabarse.

Sabni Israa’el biyya Gibxii yemmuu baafaman gara yaada Waaqayyo isaaniif qabuutti akka galaniif ture. Seera ba’uu jechuun ofiidhuma isaatiif kan mul’isu kana ture. Kaayyoon Waaqayyo isaanirratti qabu tures biyya abdii sanatti galuudhaan jireenya dubbii Waaqayyootiin qabame jiraachuudhaan naannoo isaaniitti ulfina Waaqayyoo akka mul’isaniif ture. Isaan garuu kaayyoo kana bakkaan ga’uu irra yaada mataa isaaniitti qabamuudhaan ollaa isaanii fakkaatanii buluuf waan yaalaniif kiyyoo ofitti ta’an

Waldaan kristiyaanaas saba fayyee yaada Waaqayyoof waamame dha. Afaan warra Griikiitiin waldaa kristiyaanaa jechuun ‘eklesia’ jechuu yemmuu ta’u ‘ek’ jechuun ‘ba’uu’ yemmuu ta’u ‘laaos’ jechuun ammoo ‘saba’ jechuu dha. Walitti jechoon kun lachan kan isaan ibsan ‘saba ba’e’ jechuu dha. Saba yaada Waaqayyoo mul’isuuf waamame jechuu dha. Waldaan hojiin ishee inni guddaan biyya lafaa kana keessatti yaada Waaqayyoo mul’isuu dha. Saba ergaa hojii fayyisuu karaa Yesuus Kristoos mul’ate labsuuf waamame dha.

Egaa barreeffama kana yemmuu dubbifnu gaaffii nuti of gaafachuu mallu waan lama keessaa tokko ta’uu ni mala. Tokkoffaa: ‘Ergaan Waaqayyoo kun na ga’eeraa naan? Dhaga’ee deebii itti laadheeraa? Lammaffaa ammoo ergaan kun naga’eera yoo ta’e ‘Ergaa kana dabarsaan jiraa? Isa jedhu ta’a.

(Nadeebisi gara kutaa qorannoo MQ ti)