ERGAA PHEEXIROS ISA JALQABAA

KUTAA ARFAFFAA

Eenyummaa Amantootaa.

Qorannoo ergaa Pheexroos isa jalqabaa irratti adeemsisaa jirru keessatti yeroo darbe waa’ee eenyummaa Waaqayyoo ilaallee turre. Har’a ammoo waa’ee eenyummaa amantootaa akkaataa kutaa 1Phex.1:1-3 jiru keessatti ni ilaalla.

Akkuman yeroo darbe addeessuu yaale, enyummaa waan tokkoo beekuun baay’ee barbaachisaa dha. Waan tokko maalummaan isaa hin beekamu taanaan faydaas ta’e miidhaa isaa beekuun nama rakkisa. Kanaaf waa’ee maalummaa/eenyummaa waan tokkoo beekuun baay’ee barbaachisaa dha. 1Phex. 1:1-3 keessatti ergamichi waa’ee eenyummaa mataa isaatii akka ergamaa Gooftaatti, waa’ee eenyummaa Waaqayyoo ammoo sadan tokkummaadhaan ibsa. Erga isa kan ibsee booda ammoo waa’ee warra ergaa sana fudhatanii, waa’ee eenyummaa amantootaa ammoo ibsa. Amantoonni eenyummaan isaanii kutaa kana keessatti haala afuriin ibsameera. Isaanis.

• Warra fo’aman . Ibis kun iddoo jalqabaatti eenyummaa amantoonni walitti dhufeenya isaan Waaqayyoo wajjin qaban ibsu dha. Fo’amuu yookaan filamuu jechuun carraa waan tokko keessatti qooda qabaachuuf argachuu jechuu dha. Carraan ammoo tattaaffii ofiitiin ala waan tola namaaf kennamu jechuu dha. Carraa argachuu keessaa namni ofii isaatiin hirmaannaa tokko illee hin qabu. Kun egaa hundee amantii Kiristaanummaa ti. Fayyina Waaqayyo karaa ilma isaa Yesuus Kiristoosiin namootaaf kenne argachuun kan danda’amu tattaaffii yokaan yaalii mataa ofiitiin utuu hin ta’in kennaa waaqayyo akkasumatti namaaf kennu dha. Kanaaf Yesuus, ’Isin ana hin fo’anne anatu isin fo’ate malee’ (Yoh.15:16) kan jedheef. (Rom.8:29). Pheexroos warra ergaa kana fudhatan amantootaaf yemmuu barreessu ”Waaqayyoon warrra fo’amtan” kan jedhu yaada of keessaa qaba. Jechi afaan inni jalqaba ittiin barreeffamee afaan Griikii, maxantuu ’le’ jedhu ittii qaba. Kun ammoo hiikni isaa ’Waaqayyoon’ yookaan ”Waaqayyoof” jechuu dha. Sabni Waaqayyo filate Waaqayyoon filatamee Waaqayyoofis ammoo filatame.
• Warra biyyaa baafaman . Namni biyyaa baafame biyya hormaa hin jiraatu. Amantoonni ergamichi Pheexroos barreessuuf kun warra sababa ari’atamaa iirraan kan ka’e qe’ee isaanii irraa faca’an ta’uu isaanii seensa keessatti caqasnee turre. Kun fakkeenya jireenya amanaa tokkoo kan mul’isu yemmuu ta’u amanaan jireenya isaa Yesuus Kristoositti kennee isa hordofu biyya lafaa kana irratti keessummaa ykn baqataa dha. Amantoonni biyya lafaa kana irra keessummummaa jiraatu. Biyya lafaa kana irra yeroo muraasaaf jiraanna. Abdiin keenya garuu fuula keenya dura jira. Yoh.14:1. Kana jechuun garuu nuti biyya lafaa kana irra yemmuu jiraannutti harka xaxannee hojii hiiknee jiraanna jechuu miti. Hojii akka nuti hojjennuuf Waaqayyo biyya lafaa kana irra nu kaa’e beeknee isa xumuruun itti gaafatama keenya dha. Haa ta’u iyyuu malee akka nama bara baraan biyya lafaa kana irra jiraatuutti jiranna miti. Yeroon keenya biyya lafaa kana irraa yeroo qophee ti.
• Yesuus Kiristoosiif abboomamuuf kan waamaman . Abboomamuu jechuun fedha mataa ofii dhiisanii qaama abboomaman sana jala of galchuu nama gaafata. Kufaatiin ilmaan namaa jalqaba kan inni dhalate yemmuu namni inni jalqabaa Waaqayyoof abboomamuu didetti ture. Amantoonni garuu Yesuus Kiristoosiin eenyummaa haaraa Waaqayyoof abboomamu argataniiru. Waaqayyoof abboomamuu bantuu gara eebba Waaqayyo namaaf qopheessee hundaa ti.
• Kan qulqullaa’an . “Hafuura Qulqulluudhaan qulqulleeffamtanii fo’amtaniittu.” 1Phex.1:3. Qulqulluu jechuun waan adda ba’e yookaan waan waan tokkotti cite jechuu dha. Amantoonni qulqulloota yemmuu jennu Waaqayyoof adda ba’aniiru jechuu dha. Waaqayyo ofii isaa qulqulluu dha. Inni xuraa’ummaa hundaatti kan adda ba’e dha. Egaa amantoonni akkamitti qulqulluu ta’uu danda’u? Haaressaa waldaa Kiristaanaa kan ta’e Dr. Martin Luther waa’ee eenyummaa amantootaa yemmuu dubbatu afaan warra laatinitiin ‘simul justus et pekator’ jechuun ibsee ture. Kana jechuun “amanaan tokko al tokkichatti qulqullaa’aa, cubbamaadhas” jechuu dha. Yookaan amanaan tokko 100% qulqulluu/tola dha; 100% ammoo cubbamaa dha jechuu dha. Kana jechuu Waaqayyoo nama amane tokko hojii fi eenyummaa ilma isaa Yesuus Kristoos keessaan yemmuu ilaalu 100% qulqulluu dha. Amanaan tokko hojii Yesuus Kiristoos isaaf hojjeteen alatti garuu 100% cubbamaa dha jechuu dha. Eenyu illee Yesuus Kiristoosii alatti waan barbaade yoo hojjete fuula Waaqayyoo duratti hojii mataa isaatiin qulqulluu ta’ee fudhatamuu hin danda’u. Qulqullummaan amanaa tokkoo isa qulqulluu ta’e hojii fayyisuu karaa Yesuus Kiristoos mul’ate fudhachuu fi amanuu isaa irratti hundaa’a. Namni amane tokko hojii qulqulluu fi gaarii ta’e kan inni hojjetu Waaqayyo duratti ittiin qulqulluu ta’ee fudhatama argachuuf utuu hin ta’in; waan fayyee fi qulqulluummaa fi gaarummaa Waaqayyo biraa karaa amantii waan argateefi dha. Inni kunis akka Gal.4 fi 5 keessatti arginutti ija hojii Hafuura Qulqulluu jedhama. Egaa isuma kanaaf kutaan keenya ‘Hafuura Qulqulluudhaan kan qulqulleeffamtan’ kan jedhuuf. Qulqullaa’uu fi hojii qulqulluu hojjechuun waan Hafuurri Qulqulluun nama keessatti hojjetu dha.

Amantoonni eenyumma keenya haala ibsa kutaa kana keessatti argineen of ilaaluun baay’ee barbaachisaa dha. Eenyummaan keenya inni sirriin isa nuti ofii keenyaa yaadnee, miirri keenya nutti himu yookaan isa namni kan biraan nuun jedhu utuu hin ta’in isa Waaqayyo dubbii isaa keessatti waa’ee keenya dubbate dha.

Kutaa keenya itti haanu 1Phex.1:4-9 keessatti waa’ee “ Kennaa ayyaanaa ” fudhannee dhiyaanna.

Gara qormaata MQ kutaa kanaaf qophaa'etti nadabarsi